SITU AKSAN

Situ Aksan taun 1933

SITU AKSAN (KARI CARITA)

Saupama nganjang ka wewengkon Jalan Situ Aksan – Suryani, deukeut wewengkon Cibuntu, anu katelah ku Tahu Cibuntuna, kiwari ngadeg komplek agréng. Perenahna tonggongeun Puslitbang Mineral, Jalan Sudirman Bandung. Baheulana di éta patempatan kungsi aya situ anu katelahna Situ Aksan. Dina mangsana, Situ Aksan dipaké pikeun tempat pangulinan anu kakoncara di dayeuh Bandung. Jalma anu datang bisa lalayaran di tengah situ.

Gapura Situ Aksan

Pamaréntah Hindia Walanda méré ngaran ka éta situ anu jadi tempat pangulinan ku ngaran Westerpark (taman di wétan), tapi urang dinya resep nyebut jadi Situ Aksan, sabab ngaran anu bogana Haji Aksan. Sedengkeun jalan anu nyambungkeun Westerpark jeung Grote Postweg (Jalan Raya Pos, ayeuna Jalan Sudirman) disebut Westerparkweg. Ayeuna Westerparkweg dipikawanoh ku ngaran Jalan Suryani. Situ Aksan nu ngabogaan hiji pulo leutik di tengah anu mana bisa kahontal ku parahu, ieu mangrupakeun tempat piknik paling dipikaresep dina taun 1950 nepi ka 1960. Paparahuan di Situ Aksan mangrupa kagiatan rekreasi paporit warga Bandung dina mangsana.

Westerpark Sitoe Aksan

Saban poé Minggu loba jalma anu datang ka éta situ, ngabring jeung kulawarga atawa balad-baladna, harita anu daratang maké oplét, beus DAMRI jeung kéréték/délman, aya ogé anu ngahajakeun leumpang. Harita hawa bandung beresih kénéh, sabudeuerun situ karungkup halimun. Di tengah situ aya pulo leutik, di éta pulo sok aya panggung hiburan keur anu daratang. Anu resep nguseup mah song ngahaja marekel jeujeur, maranéhna dariuk di sisi situ. Anu teu resep nguseup mah sok ngariung bari murak timbel anu ngahaja dibekel ti imahna.

Parahu paranti lalayaran di Situ Aksan

Lalayaran di Situ Aksan

Situ Aksan dipercaya ku urang Bandung salaku sésa ti Danau Purba Situ Hyang nu ayeuna geus ngiles ku wanci. Carita titilar Situ Hyang kabentuk ku walungan Citarum Purba anu kapengpet ku lahar alatan bituna Gunung Tangkuban Parahu. Situ Hyang bedah tur ngajadi leuwih ti dua belas aliran walungan anu mapay suku gunung sabudeureun Bandung, anu muarana ka Walungan Citarum.

Acara di Situ Aksan taun 1957

Kaayaan anu asri, tingtrim, hieum, héjo jeung tiis méré kaéndahan Situ Aksan dina mangsana. Hanjakalna kaayaan saperti ngan kitu ukur bisa dirasakeun nepi ka taun 1970. Dina awal 1970, Situ Aksan mimiti nyaatan alatan pangwangunan padumukan di sabeureunana. Legana Situ Aksan beuki heureut, nepi ka awal taun 1980 Situ Aksan ukur ngan saukuran balong useup. Nepi ka pamustunganana dina awal 1990, Situ Aksan bener-bener teu nyésa. Kiwari urang geus teu bisangarasakeun tur ningali kaéndahan éta situ. Kiwari carita Situ Aksan ukur sabiwir hiji ti papada jalma anu kungsi ngalaman, sarta maca tina sababaraha buku jeung pedaran.

Peta Situ Aksan taun 1920

Kawih Situ Aksan

Almarhum Mang Koko, ngaabadikeun Situ Aksan baheula dina kawih anu dijudulan Situ Aksan taun 1961, dihaleuangkeun ku Euis Nengsih.

SITU AKSAN
(Mang Koko Koswara)

Situ Aksan... Situ Aksan
Pelesiran jeung lalayaran
Andom suka seuseurian
Sempal guyon jeung gogonjakan

Situ Aksan... Situ Aksan
Matak betah mapay tambakan
Dipasieup kekembangan
Matak seger nu jalan-jalan

Situ Aksan... Situ Aksan
Keur panglipur manah sungkawa
Tempat sirna pangbeberah
Nu nandang lara asmara

Situ di Kota Bandung
Panundung pikir keur bingung
Situ Aksan tempat resmi narik asih
Cain cur cor hejo beresih
Mayarna teu sabaraha
Nu teu mampuh ge kaduga

Situ Aksan... Situ Aksan
Silih kaleng hiji pasangan
Tepak toel gogonjakan
Horeng geuning anyar tunangan 

Obah Basa : Andi Rustandi Sunarya

Dicutat tina :

- http://bandungdansekitarnya.blogspot.co.id/2011/08/situ-hyang-dan-legenda-sangkuriang.html

- https://bagusrully.wordpress.com/2009/02/17/situ-aksan-riwayatmu-kini/